ಲಖನೌ: ಸನ್ ರೈಸರ್ಸ್ ಹೈದರಾಬಾದ್ ವಿರುದ್ಧದ ಪಂದ್ಯದಲ್ಲಿ ರಾಯಲ್ ಚಾಲೆಂಜರ್ಸ್ ಬೆಂಗಳೂರು (RCB) ತಂಡ 42 ರನ್ಗಳಿಂದ ಸೋತಿತು. ಆರ್ಸಿಬಿ, ಅಂಕಪಟ್ಟಿಯಲ್ಲಿ ಮೊದಲೆರಡು ಸ್ಥಾನಗಳಲ್ಲಿ ಉಳಿಯುವ ಗುರಿಯೊಂದಿಗೆ ಬೌಲಿಂಗ್ ಆಯ್ಕೆ ಮಾಡಿಕೊಂಡಿತು. ಕಾಯಂ ನಾಯಕ ರಜತ್ ಪಾಟೀದಾರ್ ಅವರ ಬದಲು ಜಿತೇಶ್ ಶರ್ಮಾ ತಂಡವನ್ನು ಮುನ್ನಡೆಸಿದರು.ಪಂದ್ಯದ ಬಳಿಕ ನಾಯಕ ಜಿತೇಶ್ ಶರ್ಮಾ ಭರವಸೆಯ ಮಾತುಗಳನ್ನಾಡಿದ್ದಾರೆ. IPL 2025ರ ಪ್ಲೇಆಫ್ಗೆ ಮುಂಚೆ ಈ ಸೋಲು ‘ಒಂದು ಒಳ್ಳೆಯ ಸೂಚನೆʼ ಎಂದು ಹೇಳಿದ್ದಾರೆ. ಹೈದರಾಬಾದ್ ತಂಡವು ಈಗಾಗಲೇ ಸ್ಪರ್ಧೆಯಿಂದ ಹೊರಬಿದ್ದಿದೆ. ಆದರೆ RCB ತಂಡವು ಪಾಯಿಂಟ್ಸ್ ಟೇಬಲ್ನಲ್ಲಿ ಮೊದಲ ಸ್ಥಾನ ಪಡೆಯುವ ಅವಕಾಶಕ್ಕೆ ಅಡ್ಡಿಪಡಿಸಿತು.
ರಜತ್ ಪಾಟೀದಾರ್ ಅನುಪಸ್ಥಿತಿಯಲ್ಲಿ ತಂಡ ಮುನ್ನಡೆಸಿದ ಜಿತೇಶ್ ಶರ್ಮಾ, ‘ಆರ್ಸಿಬಿ ತಂಡವು ‘ಬೌಲಿಂಗ್ನಲ್ಲಿ ಎಡವಿದೆವುʼ ಎಂಬುದನ್ನು ಒಪ್ಪಿಕೊಂಡರು. ‘20-30 ರನ್ ಹೆಚ್ಚಾಯಿತು ಎಂದು ನಾನು ಭಾವಿಸುತ್ತೇನೆ. ಅವರು ಚೆನ್ನಾಗಿ ಆಡಿದರು. ಅವರ ಬೌಲಿಂಗ್ ದಾಳಿ ಬಗ್ಗೆ ನನ್ನ ಬಳಿ ಯಾವುದೇ ಉತ್ತರವಿರಲಿಲ್ಲ. ಆರಂಭದಲ್ಲಿ ಆಕ್ರಮಣಕಾರಿ ಆಟ ಇರಲಿಲ್ಲ. ಆದರೆ ಈ ಪಂದ್ಯವನ್ನು ಕಳೆದುಕೊಳ್ಳುವುದು ಒಳ್ಳೆಯದು. ಕೊನೆಯಲ್ಲಿ ನಾವು ಹೆಚ್ಚು ನಿಖರವಾಗಿ ಬೌಲಿಂಗ್ ಮಾಡಿದ್ದೇವೆʼ ಎಂದು ಪಂದ್ಯದ ನಂತರ ಹೇಳಿದರು. ‘ಕೆಲವೊಮ್ಮೆ ಪಂದ್ಯವನ್ನು ಕಳೆದುಕೊಳ್ಳುವುದು ಕೂಡ ಒಂದು ಒಳ್ಳೆಯ ಸೂಚನೆ. ಇದರಿಂದ ಬದಲಾವಣೆಗಳನ್ನು ಮಾಡಿಕೊಳ್ಳಲು ಹಾಗೂ ವಿಶ್ಲೇಷಿಸಲು ಸಾಧ್ಯವಾಗುತ್ತದೆ. ಈ ಸೋಲಿನ ನಂತರ, ನಾವು ಮತ್ತೆ ವಿಷಯಗಳನ್ನು ಪರೀಕ್ಷಿಸಲು ಹಿನ್ನಡೆ ಅನುಭವಿಸಿದ್ದೇವೆ. ನಾವು ಮುಂದೆ ಸಾಗುತ್ತೇವೆʼ ಎಂದರು.‘ತಂಡದಲ್ಲಿ ಎಲ್ಲರೂ ಕೊಡುಗೆ ನೀಡುತ್ತಿರುವುದು ಸಕಾರಾತ್ಮಕ ವಿಷಯ. ಈ ಪಂದ್ಯವನ್ನು ಕಳೆದುಕೊಳ್ಳುವುದು ಒಳ್ಳೆಯದು. ನಾವು ಚೆನ್ನಾಗಿ ಬ್ಯಾಟಿಂಗ್ ಮಾಡುತ್ತಿದ್ದೇವೆ. ಮುಂಬರುವ ಪಂದ್ಯಗಳಲ್ಲಿ ನಾವು ಉತ್ತಮ ರೀತಿಯಲ್ಲಿ ಪುಟಿದೇಳುತ್ತೇವೆʼ ಎಂದು ವಿಶ್ವಾಸ ವ್ಯಕ್ತಪಡಿಸಿದರು.
ಭುಜದ ಗಾಯಕ್ಕೆ ತುತ್ತಾಗಿ ಐಪಿಎಲ್ನಿಂದ ಹೊರಗುಳಿದಿದ್ದ ಆಸ್ಪ್ರೇಲಿಯ ಮೂಲದ ಆರ್ಸಿಬಿ ಸ್ಟಾರ್ ವೇಗಿ ಜೋಶ್ ಹೇಜಲ್ವುಡ್ ಪ್ಲೇಆಫ್ಗೂ ಮುನ್ನವೇ ತಂಡವನ್ನು ಕೂಡಿಕೊಳ್ಳಲಿದ್ದಾರೆ ಎನ್ನುವ ಮಾಹಿತಿ ಲಭ್ಯವಾಗಿದೆ. ಅವರು ಏ.27ರಂದು ಆರ್ಸಿಬಿ ಪರ ಕಡೆಯ ಪಂದ್ಯ ಆಡಿದ್ದರು. ಬಳಿಕ ತಂಡದ ಎರಡು ಪಂದ್ಯಗಳಿಗೆ ಗೈರಾಗಿದ್ದರು. ಭಾರತ-ಪಾಕಿಸ್ತಾನ ನಡುವಿನ ಸೇನಾ ಸಂಘರ್ಷದ ಬೆನ್ನಲ್ಲೇ ಐಪಿಎಲ್ ಒಂದು ವಾರ ಕಾಲ ಸ್ಥಗಿತಗೊಂಡಾಗ ಹೇಜಲ್ವುಡ್ ಸ್ವದೇಶಕ್ಕೆ ಮರಳಿದ್ದರು. ಅಲ್ಲಿ ಅವರು ಜೂನ್ನಲ್ಲಿ ನಡೆಯಲಿರುವ ಡಬ್ಲ್ಯೂಟಿಸಿ ಫೈನಲ್ ಪಂದ್ಯಕ್ಕೆ ಸಿದ್ಧತೆ ನಡೆಸುತ್ತಿದ್ದರು.ಅವರ ಫಿಟ್ನೆಸ್ ಕುರಿತು ಮಾಹಿತಿ ನೀಡಿರುವ ಆರ್ಸಿಬಿ ನಿರ್ದೇಶಕ ಮೊ ಬೋಬಟ್, ‘ಹೇಜಲ್ವುಡ್ ದಿನೇ ದಿನೇ ಚೇತರಿಕೆ ಕಾಣುತ್ತಿದ್ದು, ಮೇ 29ರ ಪ್ಲೇಆಫ್ ಒಳಗಾಗಿ ತಂಡವನ್ನು ಕೂಡಿಕೊಳ್ಳಲಿದ್ದಾರೆ,’ ಎಂದಿದ್ದಾರೆ. ಈಗಾಗಲೇ ಪ್ಲೇಆಫ್ ಪ್ರವೇಶಿಸಿರುವ ಆರ್ಸಿಬಿ ಮೇ 27ರಂದು ತನ್ನ ಕೊನೆಯ ಲೀಗ್ ಪಂದ್ಯದಲ್ಲಿ ಲಖನೌ ತಂಡವನ್ನು ಎದುರಿಸಲಿದೆ.
